4.Mee 2024
Samsdes Mëttes vun 12h00 bis 16h00 hu mir zu Kanech an der Scheier Pizza am gudden alen Holzuewe gebak. Et konnt een se mat engem Gliesche Crémant, engem Kanecher Gotteszorn, engem gudde Rouden oder enger Fläsch Béier genéissen. Merci all dene Leit, déi sech lackele gelooss haten an déi bei is laanschtkomm sin.
2022 waren mir wiederbedéngt besonnesch fréi an d´Lies – schons den 10. September!
Iwwer 30 motivéiert Fräiwëlleger hunn de Wee an den kanecher Wéngertsbierg fond fir eng Hand matt unzepaken. Hinnen soen mir e grousse Merci. No Pandemie-bedéngter Paus konnte mir 2022 endlech d´Lies och ewéi gewinnt erëm matt engem Mëttegiessen am Wéngert an e puer gudde Pätt ausklénge loossen.
Matt enger Rekordzuel vu fräiwëllegen Hänn si mir den 28. September 2019 zu Kanech an d’Lies gaangen. Richteg Chance hate mir mam Wieder, a konnten propper Drauwen liesen matt em déi 82 °Oechsle. Mir rechnen matt 1100 Fläschen Crémant.
Merci un all déi déi gehollef hunn!
Ewéi déi lescht Joëren si mir och 2019 um Blummemaart zu Ouljen präsent.
Kommt laanscht a schmaacht eise neie Schampes!
Matt e besi Verspéidung kënnt hei de Bäitrag zur Lies 2018 
Wéinst dem warme Wieder konnte mir schons relativ fréi, den 22. September am Wéngert urappen. Ewéi ëmmer konnte mir eis op vill fläisseg fräiwëlleg Hänn verloossen, déi dann och matt guddem Kascht an engem Glas Spruddel belount goufen.
Mir rechnen matt 4000 Fläschen Wäin. 73°C Oechsle, bäi exzellenter Qualitéit. Also en immens gutt Joër!
E grousse Merci u jiddereen, deen gehollef huet!
Nom succès vun 2016 organiséire mir erëm e klengt Fest zu Kanech an der Scheier, rue de l’école.
Mir maachen frësch Pizza am Steenuewen, an nierwend Softdrinks fir déi Kleng get et natirlech eise Schampes a Wäin aus dem kanecher Wéngert. Ab 11:00 geet et lass.
Kommt laanscht!
An enger Rei vun de Geschäfter vun der Naturata (Minsbech, Rollénger Gronn, Merl, Diddeléng, Ierpeldéng bäi Ettelbréck) kritt dir elo och eise Wäin a Crémant ze kafen 
E grousse Merci un d’Naturata fir dës Méiglechkeet an déi wonnerbar Kooperatioun!
E Samsdeg den 16. September ware mir, wéinst dem warme Fréijoër e besi méi fréi ewéi soss, an d’Lies. An déckem Niwwel hu mir ugefaangen, fir dunn bäi enger perfekter Hierschtsonn ewéi ëmmer den Apéro ze drénken an e gudde Maufel ze iessen.
Esouwuel matt der Quantitéit ewéi matt der Qualitéit vun den Drauwen si mir déck ze fridden. Deene ville fläissegen Hänn soe mir e grousse Merci fir d’Hëllef an freeën eis schons op déi nächst Lies. Mee nach vill méi freeë mir eis op den Joërgang 2017!
Den 13. November kënnt dir an der Scheier an der rue de l’école zu Kanech eise Schampes a Wäin schmaache kommen. D’Kanner kënnen och frësche Viz pressen, an mir maachen Pizza am Steenuewen.
Dat Ganzt vun 11:00 bis 15:00, also avis aux amateurs!
